تاریخ : جمعه 17 آذر 1391
نویسنده : محمود مرادپور
دووشان گه زه ر داغلاردا
قوشلار اوچار باغلاردا
من سئویردیم قوش اولام
یار دولانان باغلاردا
***
منیم سازیم آغلییر
اوره ک باشین داغلییر
بؤیوک غم اوره گیمی
یاندیریر سیزلادییر
***
کاشکا گول اولمویایدی
سارالیب سولمویایدی
سن ته ک اوره ک کینه لی
کیمسه ده اولمویایدی
***
داغلار باشیندا لاله
الیمده وار پیاله
سن منیمسن من سنین
دوشمه آیری خیاله
***
نارینجا باخ نارینجا
ساخلارام سارالینجا
منده اورک قالمادی
یار گویلونی آلینجا
***
نارینجا باخ نارینجا٬
ال وورما سارالینجا.
تولئیدیم قورتولیدیم٬
بوگونلره قالینجا
***
من عاشیغام نارینجا٬
ایسترم سارالینجا.
سونام ساللاندی گلدی٬
لاچین اونون یانینجا
***
بو باغدا بار اولونجا،
هئیوالار نار اولونجا .
دیل آچار دلی گویلوم ،
سن منه یار اولونجا.
***
توت آغاجی بو یونجا ،
توت یئمه دیم دویونجا .
یاری خلوتده گورنده ،
دانیشمادیم ( اوپوشمدیم ) دویونجا
***
خال گؤرمدیم خالینجا٬
خالیندان کام آلینجا .
بیلسیدیم وفان بودور٬
دوشمزدیم من دالینجا
***
امرود آغاجی هاچا٬
بو داغیندا گول آچا .
او یارا قوربان اولوم٬
دیندیره گؤیلوم آچا
***
امرود آغاجی هاچا٬
الیم دولاشدی ساچا .
بیر مرد اوغلان ایسترم٬
منی گؤتوره قاچا
قارا دنیز قارادی
اوره ییمیز یارادی
بو آمان سیز یول لارین
سونو گورون هارادی
***
عزیزیم ، گول الللر،
آغ بیلکلر ،گول الللر،
دریاجا عقلین اولسا ،
یوخسول اولسان گولللر.
***
آپاردی چایلار منی ،
هفته لر ، ایلار منی ،
یوکوم قورقوشوم یوکی،
یوردو بو تایلار منی.
***
من عاشیقام هر آیلار
هر اولدوزلار ،هر آیلار
بوردا بیر گول بیتیبدی،
سوسوزوندان هارایلار.
***
من عاشیقام هر آیلار،
هر اولدوزلار هر آیلار،
باشیم جلاد الینده ،
دیلیم سنی هارایلار.
***
قاشلارین قیبله گاهدی،
قیبله دئسم گوناهدی،
داغلارا دومان چوکسه،
او داغ من چکن آهدی.
***
عاشیق سوزون گیزله در،
سوزون دوزون گیزله در،
سن چمنه چیخاندا ،
لاله اوزون گیزله در.
***
گوزلرین خومار ایندی،
یاش توکر یومار ایندی،
توک زولفون سینن اوسته،
گورن نار اومار ایندی.
***
آچیلارام گول کیمی،
اوخورام بولبول کیمی،
گویولومه دگن اولسا،
ساراللام سونبول کیمی.
***
من عاشیق گول آنباری،
گول اکدیم،گول انباری،
هیجران قویماز گوز آچام،
درد قویماز گولم باری
***
من عاشیق باشدان یارا ،
آرتیبدیر باشدان یارا،
منی حسرت یاراتدی،
یاردان باشدان یارا.
***
آغلارام آغلار کیمی،
دردیم وار داغلار کیمی،
خزان اولدوم توکولدوم،
ویرانه باغلار کیمی.
***
دومانلی داغلار گویلوم،
نیسکیللی باغلار گویلوم،
نه آچیلار،نه گولر،
همیشه آغلار گویلوم.
***
غوربته دوشدو یولوم،
دوشمن آلیب ساغ- سولوم،
ائلدن آیری دوشه لی،
بو خوولانیبدی قولوم.
***
من عاشیق آه و زاردا،
جانیم درتده آزاردا،
او گوندن کی قول اولدوم،
ساتیلیدم هر بازاردا .
***
عزیزیم وطن یاخچی،
کوینکی کتان یاخچی،
غوربت یئر جنت اولسا،
یئنه ده وطن یاخچی.
***
عزیزیم دیلن گز،
باغدا گوله دیلن گز،
غوربتده خان اولونجا،
وطنینده دیلن گز.
***
فلکین داد الیندن،
اولمادیم شاد الیندن،
یامان یئرده ییخیلیدم،
توتمادی یاد الیمدن.
***
سو تک آرخا دولاندیم،
ساپ تک چارخا دولاندیم،
ظالیم فلک الیندن،
قورخا -قورخا دولاندیم.
***
باهاسیز داشدی دونیا،
چوروک آغاجدی دونیا،
کیمه دئییم دردیمی ،
بوتون قان یاشدی دونیا.
***
عاشیقین هاراییندان،
ائل یاتماز هاراییندان،
گونده بیر کرپیچ دوشور،
عومورومون ساراییندان .
***
لای- لای دئدیم یاتاسان،
قیزیل گوله باتاسان،
قیزیل گولون ایچینده،
شیرین یوخو تاپاسان.
***
لا- لای بئشیگیم لا- لای،
ائویم- ائشیگیم لا- لای،
سن یات شیرین یوخودا،
چکیم کئشیگین لا- لای.
***
ننه م ،او نازلی قویون،
قرقاوول گوزلو قویون،
پنیری کسمه- کسمه ،
قاتیقی اوزلی قویون.
***
ننه م، او خاللی گئچی،
ممه سی باللی گئچی،
اوجا قایا باشیندا،
توتوبدی یاللی گئچی.
***
عاشیق سوزگون گوزلریم،
غمدن اوزگون گوزلریم،
گوزلدن دویا بیلمز،
باخسا یوز گون گوزلریم.
***
باغلاریندا اوزوم وار،
گئتمه دایان سوزوم وار،
گوزلریندن قورخورام،
قاشلاریندا گوزوم وار.
***
عاشیق گلیر سازی وار،
غمزه سی وار نازی وار،
هر باهارین بیر قیشی،
هر قیشین بیر یازی وار.
***
ای زامانا، زامانا،
اوخو قویدون کامانا،
ائششکلر آرپا یئییر،
آت حسرتدور سامانا.
***
آغ آلما،قیزیل آلما،
نیمچه یه دوزول آلما ،
چیرکین آل نجیب اولسون،
بد اصیل گوزل آلما.
***
عزیزیم کاساد اولماز،
مرد الی کاساد اولماز،
یوز نامردین چوره یین،
دوغراسان کاسا دولماز.
***
من عاشیق دالداسینا،
مرد ایگیت دالداسینا،
نامرد آصلان اولسادا،
سیغینما دالداسینا.
***
عزیزیم آی اوتانماز،
گون دوغار آی اوتانماز،
پیسین پیس عمللرین،
اوزونه سای، اوتانماز.
***
اوز ه رلیک سن هاواسان،
هر بیردرده داواسان،
درد قاپیدان گلنده،
سن باجادان قووارسان.
لطفا نظر بدهید. ممنون
|
امتیاز مطلب : 6
|
تعداد امتیازدهندگان : 2
|
مجموع امتیاز : 2
عضو شوید
عضویت سریع
آمار مطالب
آمار بازدید
